Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. perque Paraetoniae celebratum litora Syrtis.
  2. ipse olim antiquo primum Garamanticus Hammon
  3. scire pater dederat Synhalo morsusque ferarum
  4. telorumque grauis ictus sedare medendo.
  5. atque is deinde suo moriens caelestia dona
  6. monstrauit nato, natusque heredis honori
  7. tramisit patrias artis. quem deinde secutus
  8. haud leuior fama Synhalus Garamantica sollers
  9. monstrata augebat studio multaque uetustum
  10. Hammonis comitem numerabat imagine patrem.
  11. tum proauita ferens leni medicamina dextra
  12. ocius, intortos de more astrictus amictus,
  13. mulcebat lympha purgatum sanguine uulnus.
  14. at Mago, exuuias secum caesique uolutans
  15. hostis mente necem, fraternas pectore curas
  16. pellebat dictis et casum laude leuabat:
  17. ‘Parce metu, germane. meis medicamina nulla
  18. aduersis maiora feres: iacet Appius hasta
  19. ad manis pulsus nostra. si uita relinquat,
  20. sat nobis actum est: sequar hostem laetus ad umbras.’