Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et diuisum umeris iacuit caput. at Batus, amens
  2. qui luctatur equo parmaque incursibus obstat,
  3. ictu quadrupedis fulua porrectus harena
  4. elisa incussis amisit calcibus ora.
  5. perfurit Ausonius turbata per aequora ductor,
  6. ceu Geticus Boreas, totum cum sustulit imo
  7. Icarium fundo uictor mare: nauita uasto
  8. iactatur sparsus lacerata classe profundo,
  9. cunctaque canenti perfunditur aequore Cyclas.
  10. Crixus, ut in tenui spes exiguumque salutis,
  11. ---
  12. armat contemptu mentem necis. horrida barba
  13. sanguinea rutilat spuma, rictusque furentis
  14. albet, et adfuso squalent a puluere crines.