Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. inuadunt alacres inimicum pontibus amnem:
  2. nunc celso capite et ceruicibus arma tuentur,
  3. nunc ualidis gurges certatim frangitur ulnis.
  4. fluminea sonipes religatus ducitur alno,
  5. belua nec retinet tardante Libyssa timore.
  6. nam trabibus uada et iniecta tellure repertum
  7. conexas operire trabes ac ducere in altum
  8. paulatim ripae resolutis aggere uinclis.
  9. at gregis inlapsu fremebundo territus atras
  10. expauit moles Rhodanus stagnisque refusis
  11. torsit harenoso minitantia murmura fundo.
  12. Iamque Tricastinis incedit finibus agmen,
  13. iam facilis campos, iam rura Vocontia carpit.
  14. turbidus hic truncis saxisque Druentia laetum
  15. ductoris uastauit iter. namque Alpibus ortus
  16. auulsas ornos et adesi fragmina montis
  17. cum sonitu uoluens fertur latrantibus undis
  18. ac uada translato mutat fallacia cursu,
  19. non pediti fidus, patulis non puppibus aequus.
  20. et tunc imbre recens fuso correpta sub armis