Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. uiuentis rapto populos luxuque solutum
  2. omne decus multaque oppressum nocte pudorem.
  3. uis colitur, iurisque locum sibi uindicat ensis,
  4. et probris cessit uirtus. en, aspice gentes:
  5. nemo insons: pacem seruant commercia culpae.
  6. sed si cura, tua fundata ut moenia dextra
  7. dignum te seruent memorando fine uigorem,
  8. dedita nec fessi tramittant corpora Poeno:
  9. quod solum nunc fata sinunt seriesque futuri,
  10. extendam leti decus atque in saecula mittam
  11. ipsaque laudatas ad manes prosequar umbras.’
  12. Inde seuera leui decurrens aethere uirgo
  13. luctantem fatis petit inflammata Saguntum.
  14. inuadit mentes et pectora nota pererrat
  15. immittitque animis numen. tum fusa medullis
  16. implicat atque sui flagrantem inspirat amorem.
  17. arma uolunt temptantque aegros ad proelia nisus.
  18. insperatus adest uigor, interiusque recursat
  19. dulcis honor diuae et sacrum pro uirgine letum.
  20. it tacitus fessis per ouantia pectora sensus