Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. interdumque manu, interdum clamore minisque:
  2. ‘State, uiri; meus ille hostis; mihi gloria magnae,
  3. state, uenit pugnae. muro tectisque Sagunti
  4. hac abigam Poenos dextra; spectacula tantum
  5. ferte, uiri; uel, si cunctos metus acer in urbem
  6. (heu deforme!) rapit, soli mihi claudite portas.’
  7. At Poenus rapido praeceps ad moenia cursu,
  8. dum pauitant trepidi rerum fessique salutis,
  9. tendebat. stat primam urbem murosque patentis
  10. postposita caede et dilata inuadere pugna.
  11. id postquam Herculeae custos uidet impiger arae,
  12. emicat et uelox formidine praeuenit hostem.
  13. gliscit Elissaeo uiolentior ira tyranno:
  14. ‘Tu solue interea nobis, bone ianitor urbis,
  15. supplicium, ut pandas’ inquit tua moenia leto.
  16. nec plura effari sinit ira, rotatque coruscum
  17. mucronem; sed contortum prior impete uasto
  18. Daunius huic robur iuuenis iacit. arma fragore
  19. icta graui raucum gemuere, alteque resultant
  20. aere inlisa cauo nodosae pondera clauae.