Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ac simul aerati radiauit luminis umbo,
  2. et concussa procul membris uelocibus arma
  3. letiferum intonuere, fugam perculsa repente
  4. ad muros trepido conuertunt agmina cursu:
  5. sicut agit leuibus per sera crepuscula pennis
  6. e pastu uolucres ad nota cubilia uesper;
  7. aut, ubi Cecropius formidine nubis aquosae
  8. sparsa super flores examina tollit Hymettos,
  9. ad dulcis ceras et odori corticis antra
  10. mellis apes grauidae properant densoque uolatu
  11. raucum conexae glomerant ad limina murmur.
  12. praecipitat metus attonitos, caecique feruntur.
  13. heu blandum caeli lumen! tantone cauetur
  14. mors reditura metu nascentique addita fata?