Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ‘Nate, salus quondam genitoris, nate, parentis
  2. et post fata decus, bellorum dira creatrix
  3. euastanda tibi tellus, et caede superbi
  4. ductores Libyae cauta uirtute domandi,
  5. qui sua nunc trinis diducunt agmina castris.
  6. si conferre manum libeat, coeantque uocatae
  7. hinc atque hinc acies, ualeat quis ferre ruentis
  8. tergemina cum mole uiros? absiste labore
  9. ancipiti, sed nec segnis potiora capesse.
  10. urbs colitur Teucro quondam fundata uetusto,
  11. nomine Carthago: Tyrius tenet incola muros.
  12. ut Libyae sua, sic terris memorabile Hiberis
  13. haec caput est. non ulla opibus certauerit auri,
  14. non portu celsoue situ, non dotibus arui
  15. uberis aut agili fabricanda ad tela uigore.