Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. at, qua diuersi lateris frons tertia terrae
  2. uergit in Italiam prolato ad litora dorso,
  3. celsus harenosa tollit se mole Pelorus.
  4. His longo mitis placide dominator in aeuo
  5. praefuerat terris Hieron, tractare sereno
  6. imperio uulgum pollens et pectora nullo
  7. parentum exagitare metu, pactamque per aras
  8. haud facilis temerare fidem socialia iura
  9. Ausoniis multos seruarat casta per annos.
  10. uerum, ubi fata uirum fragili soluere senecta,
  11. primaeuo cessit sceptrum exitiale nepoti,
  12. et placida indomitos accepit regia mores.
  13. namque bis octonis nondum rex praeditus annis
  14. caligare alto in solio nec pondera regni
  15. posse pati et nimium fluxis confidere rebus.