Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et patulam Cyanen lateque palustribus undis
  2. stagnantem Stygio Cocyti oppleuit odore
  3. temporaque autumni laetis florentia donis
  4. foedauit rapidoque accendit fulminis igni.
  5. fumabat crassus nebulis caliginis aer,
  6. squalebat tellus uitiato feruida dorso
  7. nec uictum dabat aut ullas languentibus umbras,
  8. atque ater picea uapor expirabat in aethra.
  9. uim primi sensere canes. mox nubibus atris
  10. fluxit deficiens penna labente uolucris.
  11. inde ferae siluis sterni. tum serpere labes
  12. Tartarea atque haustis populari castra maniplis.
  13. arebat lingua, et gelidus per uiscera sudor
  14. corpore manabat tremulo. descendere fauces
  15. abnuerant siccae iussorum alimenta ciborum.