Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. mulcebat siluas, non umquam tempore eodem
  2. Siren adsuetos effudit in aequore cantus,
  3. Scyllaei tacuere canes, stetit atra Charybdis,
  4. et laetus scopulis audiuit iubila Cyclops.
  5. progeniem hauserunt et nomen amabile flammae.
  6. Innatat ecce super transtris fumantibus asper
  7. Ornytos ac longam sibimet facit aequore mortem,
  8. qualis Oiliades, fulmen iaculante Minerua,
  9. surgentis domuit fluctus ardentibus ulnis.
  10. transigitur ualida medius, dum se adleuat, alni
  11. cuspide Marmarides Sciron. pars subnatat unda
  12. membrorum, pars extat aquis totumque per aequor
  13. portatur, rigido, miserandum, immortua rostro.
  14. accelerant puppes utrimque atque ora ruentum
  15. sanguinei feriunt remorum aspergine rores.
  16. ipse adeo senis ductor Rhoeteius ibat
  17. pulsibus et ualido superabat remige uentos.
  18. quam rapidis puppem manibus frenare Lilaeus
  19. dum temptat, saeua truncatur membra bipenni,
  20. ac fert haerentis trabibus ratis incita palmas.