Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. taxus Cocyti rigua frondosior unda.
  2. hic dirae uolucres pastusque cadauere uultur
  3. et multus bubo ac sparsis strix sanguine pennis
  4. Harpyiaeque fouent nidos atque omnibus haerent
  5. condensae foliis: saeuit stridoribus arbor.
  6. has inter formas coniunx Iunonis Auernae
  7. suggestu residens cognoscit crimina regum.
  8. stant uincti, seroque piget sub iudice culpae:
  9. circum errant Furiae Poenarumque omnis imago.
  10. quam uellent numquam sceptris fulsisse superbis!
  11. insultant duro imperio non digna nec aequa
  12. ad superos passi manes, quaeque ante profari
  13. non licitum uiuis, tandem permissa queruntur.
  14. tunc alius saeuis religatur rupe catenis,
  15. ast alius subigit saxum contra ardua montis,
  16. uipereo domat hunc aeterna Megaera flagello.
  17. talia letiferis restant patienda tyrannis.
  18. sed te maternos tempus cognoscere uultus,
  19. cuius prima uenit non tardis passibus umbra.’
  20. Astabat fecunda Iouis Pomponia furto.