Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Contra quae ductor: ‘Fesso mihi proxima tandem
  2. lux gratos Phaethontis equos auertit et atris
  3. aeternum demisit aquis. sed lenta meorum
  4. dum uanos ritus cura et sollemnia uulgi
  5. exequitur, cessat flammis imponere corpus,
  6. ut portet tumulis per longum membra paternis.
  7. quod te per nostri Martis precor aemula facta,
  8. arce quae putris artus medicamina seruant
  9. daque uago portas quamprimum Acherontis adire.’
  10. Tunc iuuenis: ‘Gens o ueteris pulcherrima Clausi,
  11. haud ulla ante tuam, quamquam non parua fatigent,
  12. curarum prior extiterit. namque ista per omnis
  13. discrimen seruat populos uariatque iacentum
  14. exequias tumuli et cinerum sententia discors.
  15. tellure, ut perhibent, (is mos anticus) Hibera
  16. exanima obscenus consumit corpora uultur.
  17. regia cum lucem posuerunt membra, probatum est
  18. Hyrcanis adhibere canes. Aegyptia tellus
  19. claudit odorato post funus stantia saxo
  20. corpora et a mensis exanguem haud separat umbram.