Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Maenala, ubi argutis longe de uertice sacro
  2. dulce sonans calamis ducit stabula omnia cantu.
  3. At legio Ausonidum, flammas ductore iubente
  4. arceri portis stantisque relinquere muros
  5. (mite decus mentis), condunt ensesque facesque.
  6. multa deum templis domibusque nitentibus auro
  7. egeritur praeda et uictus alimenta superbi,
  8. quisque bonis periere, uirum de corpore uestes
  9. femineae mensaeque alia tellure petitae
  10. poculaque Eoa luxum inritantia gemma.
  11. nec modus argento, caelataque pondera facti
  12. tantum epulis auri, tum passim corpora longo
  13. ordine captiua, et domibus deprompta talenta,
  14. pascere longincum non deficientia bellum,
  15. immensique greges famulae ad conuiuia turbae.
  16. Fuluius, ut finem spoliandis aedibus aere
  17. belligero reuocante dedit, sublimis ab alto
  18. suggestu, magnis fautor non futtilis ausis,
  19. Lanuuio generate, inquit ‘quem Sospita Iuno