Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. nulla in praeruptum tam prona et inhospita cautes,
  2. in qua non librans corpus similisque uolanti
  3. cornipedem tulerit praecisa per auia plantam.
  4. interdum inflexus medio nascentia tergo
  5. respicit adridens hirtae ludibria caudae,
  6. obtendensque manum solem inferuescere fronti
  7. arcet et umbrato perlustrat pascua uisu.
  8. hic, postquam mandata dei perfecta malamque
  9. sedauit rabiem et permulsit corda furentum,
  10. Arcadiae uolucris saltus et amata reuisit
  11. Maenala, ubi argutis longe de uertice sacro
  12. dulce sonans calamis ducit stabula omnia cantu.
  13. At legio Ausonidum, flammas ductore iubente
  14. arceri portis stantisque relinquere muros
  15. (mite decus mentis), condunt ensesque facesque.
  16. multa deum templis domibusque nitentibus auro
  17. egeritur praeda et uictus alimenta superbi,
  18. quisque bonis periere, uirum de corpore uestes
  19. femineae mensaeque alia tellure petitae
  20. poculaque Eoa luxum inritantia gemma.