Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. forma ex his Numitor, cursu plantaque uolucri
  2. praestabat Laurens, membrorum mole Taburnus.
  3. sed non una uiris tela: hic mirabilis arcu,
  4. ille hastam quatere ac medicatae cuspidis ictu
  5. proelia moliri et nudo non credere ferro,
  6. tertius aptabat flammis ac sulphure taedas:
  7. qualis Atlantiaco memoratur litore quondam
  8. monstrum Geryones immane tricorporis irae,
  9. cui tres in pugna dextrae uaria arma gerebant:
  10. una ignes saeuos, ast altera pone sagittas
  11. fundebat, ualidam torquebat tertia cornum,
  12. atque uno diuersa dabat tria uulnera nisu.
  13. hos ubi non aequis uariantes proelia consul
  14. conspexit telis et portae limina circum
  15. stragem ac perfusos subeuntum sanguine postis,
  16. concitat intortam furiatis uiribus hastam.
  17. letum triste ferens auras secat Itala taxus
  18. et, qua nudarat, dum fundit spicula ab alto,
  19. arcum protendens Numitor latus, ilia transit.