Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Respectans abit et castris auulsa moueri
  2. signa iubet ductor remeaturumque minatur.
  3. redditur extemplo flagrantior aethere lampas,
  4. et tremula infuso resplendent caerula Phoebo.
  5. at procul e muris uidere ut signa reuelli
  6. Aeneadae uersumque ducem, tacita ora uicissim
  7. ostentant nutuque docent quod credere magno
  8. non audent haerente metu, nec abire uolentis
  9. sed fraudem insidiasque putant et Punica corda,
  10. ac tacitae natis infigunt oscula matres:
  11. donec procedens oculis sese abstulit agmen
  12. suspectosque dolos dempto terrore resoluit.
  13. tum uero passim sacra in Capitolia pergunt
  14. inque uicem amplexi permixta uoce triumphum
  15. Tarpeii clamant Iouis ac delubra coronant.
  16. iamque omnis pandunt portas: ruit undique laetum
  17. non sperata petens dudum sibi gaudia uulgus.
  18. hi spectant, quo fixa loco tentoria regis
  19. astiterint, hi, qua celsus de sede uocatas
  20. adfatus fuerit turmas, ubi belliger Astur