Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. bis septem demissa neci (nec substitit agmen)
  2. milia, bis septem, quae non sollertior ense,
  3. sed genus insignis, iustis ducebat in armis
  4. Fuluius: ast aeque per corpora fusa iacentum
  5. raptum iter est, uictorque moram non passus eundi.
  6. exequiae tantum famam nomenque uolentem
  7. mitificae mentis tenuerunt funere laeto.
  8. namque per insidias, infandum, et ab hospite caesus,
  9. conloquium et promissa petit dum perfida gentis
  10. Lucanae, Gracchus caeco circumdatus astu
  11. occiderat, laudemque Libys rapiebat humandi.
  12. Sed nunc, ut scitum celerare ad moenia Poenum,
  13. haud stabat res ulla loco: iam consul uterque
  14. praecipites aderant, Nola uis omnis, et Arpis
  15. aeui floridior Fabius rapida arma ferebat.
  16. hinc Nero et hinc uolucris Silanus nocte dieque
  17. impellebat agens properata ad bella cohortis.
  18. undique conueniunt, pariterque opponere cunctos
  19. uni ductores iuueni placet. arduus ipse
  20. Tifata insidit, propior qua moenibus instat