Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Hoc habitu terrae nemorosa per inuia crebro
  2. Torquatum eludens Hostus Sidonia pugnae
  3. tela expectabat sociosque laboris Hiberos.
  4. qui postquam appulsis animos auxere carinis,
  5. haud mora: prorumpit latebris, aduersaque late
  6. agmina inhorrescunt, longumque coire uidetur
  7. et conferre gradum. media interualla patentis
  8. corripiunt campi properatis eminus hastis,
  9. donec ad expertos enses, fidissima tela,
  10. peruentum. dira inde lues: caeduntque caduntque
  11. alternique animas saeuo in mucrone relincunt.
  12. Non equidem innumeras caedes totque horrida facta
  13. sperarim tanto digne pro nomine rerum
  14. pandere nec dictis bellantum aequare calorem.
  15. sed uos, Calliope, nostro donate labori
  16. nota parum magni longo tradantur ut aeuo
  17. facta uiri, et meritum uati sacremus honorem.
  18. Ennius, antiqua Messapi ab origine regis,
  19. miscebat primas acies, Latiaeque superbum