Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. namque ortum Iliaca iactans ab origine nomen
  2. in bella Hampsagoras Tyrios renouata uocarat.
  3. proles pulchra uiro nec tali digna parente
  4. Hostus erat, cuius fretus fulgente iuuenta
  5. ipse asper paci crudos sine uiribus annos
  6. barbarici studio ritus refouebat in armis.
  7. isque ubi Torquatum raptim properata ferentem
  8. signa uidet pugnaeque auidas accedere dextras,
  9. fraude loci nota latebrosa per auia saltus
  10. euolat et prouisa fugae compendia captans
  11. uirgulta tegitur ualle ac frondentibus umbris.
  12. Insula fluctisono circumuallata profundo
  13. fastigatur aquis compressaque gurgite terras
  14. enormis cohibet nudae sub imagine plantae:
  15. inde Ichnusa prius Grais memorata colonis.
  16. mox Libyci Sardus generoso sanguine fidens
  17. Herculis ex sese mutauit nomina terrae.