Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ille dies primus docuit, quod credere nemo
  2. auderet superis, Martis certamine sisti
  3. posse ducem Libyae. raptant currusque uirosque
  4. Massylamque feram, et uiuis auulsa reportant
  5. tegmina bellantum atque abeunt, sub cuspide terga
  6. contenti uidisse ducis. tum Martis adaequant
  7. Marcellum decori: graditur comitante triumpho
  8. maior quam ferret cum uictor opima Tonanti.
  9. Inde furens, postquam uallo uix depulit hostem,
  10. ductor Agenoreus ‘Quando hanc quantoque cruore
  11. hostili labem eluerim? mea terga uidere
  12. contigit Ausoniae? mene,’ inquit ‘summe deorum,
  13. post Trebiam statuis tam turpi funere dignum?
  14. uosque, inuicta diu, nunc heu sine Marte iuuentus,
  15. debellata bonis Capuae, non degener ipse
  16. gestorum Ausoniis uerti uictricia signa:
  17. uobis terga dedi. uidi, cum ad bella uocarem,
  18. non secus atque Italo fugere a ductore pauentis.
  19. quid relicum prisci Martis tibi, qui dare terga
  20. me reuocante potes?’ fundebat talia Poenus.