Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Iamque fugae immodicus tendit certamine gressum
  2. praecipitem uersis Poenorum exercitus armis.
  3. adsequitur telis hostis, longasque uiritim
  4. exsatiant iras cladum caeloque cruentos
  5. certatim ostentant et dis ultoribus enses.
  6. ille dies primus docuit, quod credere nemo
  7. auderet superis, Martis certamine sisti
  8. posse ducem Libyae. raptant currusque uirosque
  9. Massylamque feram, et uiuis auulsa reportant
  10. tegmina bellantum atque abeunt, sub cuspide terga
  11. contenti uidisse ducis. tum Martis adaequant
  12. Marcellum decori: graditur comitante triumpho
  13. maior quam ferret cum uictor opima Tonanti.
  14. Inde furens, postquam uallo uix depulit hostem,
  15. ductor Agenoreus ‘Quando hanc quantoque cruore
  16. hostili labem eluerim? mea terga uidere
  17. contigit Ausoniae? mene,’ inquit ‘summe deorum,
  18. post Trebiam statuis tam turpi funere dignum?
  19. uosque, inuicta diu, nunc heu sine Marte iuuentus,
  20. debellata bonis Capuae, non degener ipse