Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. seruabis portae, Nero; tu conuerte cohortes
  2. ad laeuam patrias et Larinatia signa,
  3. clarum Volscorum, Tulli, decus. ast ubi iusso,
  4. per tacitum ruptis subita ui fundite portis
  5. telorum in campos nimbum. ferar ipse reuulsa
  6. in medios equitumque traham certamina porta.’
  7. Dumque ea Marcellus, iam claustra reuellere Poeni
  8. et scalis spretis temptabant rumpere muros.
  9. insonuere tubae passim clamorque uirorum
  10. hinnitusque, simul litui raucoque tumultu
  11. cornua et in membris concussa furentibus arma.
  12. fertur acerba lues disiectis incita portis
  13. effusaeque ruunt inopino flumine turmae,
  14. improbus ut fractis exundat molibus amnis,
  15. propulsum ut Borea scopulis impingitur aequor,
  16. ut rupto terras inuadunt carcere uenti.
  17. nec torrente Libys uiso armorumque uirumque
  18. deiectus spe stare ualet. dux Dardanus instat
  19. attonito, praegressus equo, tergisque ruentum
  20. incumbens hasta socios nunc uoce fatigat: