Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ingemit aduersis respectansque inrita tecta
  2. urbe Dicarchea parat exsatiare dolorem.
  3. hic quoque nunc pelagus, nunc muri saxea moles
  4. officit audenti defensantumque labores.
  5. dumque tenet socios dura atque obsaepta uiarum
  6. rumpere nitentis lentus labor, ipse propinqua
  7. stagnorum terraeque simul miracula lustrat.
  8. Primores adsunt Capuae: docet ille, tepentes
  9. unde ferant nomen Baiae, comitemque dedisse
  10. Dulichiae puppis stagno sua nomina monstrat.
  11. ast hic Lucrino mansisse uocabula quondam
  12. Cocyti memorat medioque in gurgite ponti
  13. Herculeum commendat iter, qua discidit aequor
  14. Amphitryoniades armenti uictor Hiberi.
  15. ille, olim populis dictum Styga, nomine uerso
  16. stagna inter celebrem nunc mitia monstrat Auernum:
  17. tum tristi nemore atque umbris nigrantibus horrens