Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. mactatis superum dignantur honore iuuencis.
  2. sic patriam Mago et portas ingressus ouantis
  3. fraternae laudis fama. ruit inde senatus,
  4. et multo patrum stipatur curia coetu.
  5. tum diuos ueneratus auum de more uetusto
  6. Martem ait ‘egregium et fractas, quis Itala tellus
  7. nitebatur, opes, pars ipse haud parua laborum,
  8. nuntio. pugnatum superis in uota secundis.
  9. est locus, Aetoli signat quem gloria regis,
  10. possessus quondam prisca inter saecula Dauno.
  11. umentis rapido circumdat gurgite campos
  12. Aufidus et stagnis intercipit arua refusis,
  13. mox fluctus ferit Hadriacos magnoque fragore
  14. cedentem impellit retrorsus in aequora pontum.
  15. hic Varro et magnum Latia inter nomina Paulus
  16. nomen, quis rerum ducibus permissa potestas,
  17. uixdum depulsa nigrae caligine noctis