Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. o dirae Ciconum matres Geticique furores
  2. et damnata deis Rhodope! tulit ora reuulsa
  3. in pontum, ripis utraque sequentibus, Hebrus.
  4. tum quoque, cum rapidi caput a ceruice recisum
  5. portarent fluctus, subito emicuere per undas
  6. ad murmur cete toto exultantia ponto.’
  7. Sic tunc Pierius bellis durata uirorum
  8. pectora Castalio frangebat carmine Teuthras.
  9. interea placida attulerant iam flamina terris
  10. Magonem Libycis. lauro redimita subibat
  11. optatos puppis portus, pelagoque micabant
  12. captiua arma procul celsa fulgentia prora.
  13. at patulo surgens iam dudum ex aequore late
  14. nauticus implebat resonantia litora clamor,
  15. et simul adductis percussa ad pectora tonsis
  16. centeno fractus spumabat uerbere pontus.
  17. nec lentum in medios rapienda ad gaudia uulgus
  18. procurrit fluctus, elataque turba fauore
  19. certatim ingenti celebrat noua gaudia plausu.