Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. exuuiae, fausti superis libamina belli.
  2. altera curarum Libycis dimittitur oris
  3. heu Decius, reduci lentas seruatus ad iras,
  4. ni poenae iuuenem indignae miseratus ab alto
  5. Iuppiter antiquam Batti uertisset ad urbem.
  6. hic Pellaea uirum Ptolomaei sceptra uehentum
  7. eripuere minis, resolutaque uincula collo.
  8. atque eadem uitae custos mox deinde quieto
  9. accepit tellus ossa inuiolata sepulchro.
  10. Nec Venerem interea fugit exoptabile tempus
  11. Poenorum mentes caeco per laeta premendi
  12. exitio et luxu corda importuna domandi.
  13. spargere tela manu passim fallentia natis
  14. imperat et tacitas in pectora mittere flammas.
  15. tum pueris dulce adridens: ‘Eat improba Iuno
  16. et nos (nec mirum, quid enim sumus?) acta secundis
  17. despiciat. ualet illa manu, ualet illa lacertis:
  18. paruula nos arcu puerili spicula sensim
  19. fundimus, et nullus nostro de uulnere sanguis.
  20. uerum, agite, o mea turba, precor (nunc tempus), adeste