Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. ut perferre queas furibunda insomnia consul?
  2. nonne exturbatos iam dudum limine templi
  3. praecipites agis ad portas, et discere cogis
  4. semiuiros, quod sit nostro de more creati
  5. consulis imperium? non umquam sobria pubes
  6. et peritura breui, moneo, ocius urbe facesse.
  7. muros ante tuos, ut par est, debita ductor
  8. armatus responsa dabit.’ consurgere cuncti
  9. hinc pariter magnoque uiros clamore premebant.
  10. necnon et foribus propere Campana iuuentus
  11. extulit ipsa gradum, tantaeque dolore repulsae
  12. concitus Hannibalem uoluebat Virrius ore.
  13. Fuluius (huic nam spondebant praesagia mentis
  14. uenturum decus, et Capuae pereuntis imago
  15. iam tum erat ante oculos) Non si Carthaginis inquit
  16. ‘ductorem uestris deuinctum colla catenis
  17. Romam uictor agis, posthac intrare Quirini
  18. sacratas dabitur sedes. tende ocius, oro,
  19. quo mens aegra uocat.’ referunt haec inde citati
  20. mixta minis et torua trucis responsa senatus.