Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. prima acies, non parca fugae. Labienus et Ocres
  2. sternuntur leto atque Opiter quos Setia colle
  3. uitifero, celsis Labienum Cingula saxa
  4. miserunt muris. iunxit fera tempora leti
  5. Sidonius non consimili discrimine miles:
  6. nam Labienus obit penetrante per ilia corno,
  7. fratres, hic umero, cecidere, hic poplite, caesis.
  8. oppetis et Tyrio super inguina fixe ueruto
  9. Maecenas, cui Maeonia uenerabile terra
  10. et sceptris olim celebratum nomen Etruscis.
  11. per medios agitur, proiecto lucis amore
  12. Hannibalem lustrans, Paulus. sors una uidetur
  13. aspera, si occumbat ductore superstite Poeno.
  14. Quam metuens molem (neque enim certamine sumpto
  15. tempestas tanta et rabies impune fuisset)
  16. in faciem pauidi Iuno conuersa Metelli
  17. Quid uanos, inquit ‘Latio spes unica consul,
  18. incassumque moues fato renuente furores?
  19. si superest Paulus, restant Aeneia regna;
  20. sin secus, Ausoniam tecum trahis. ire tumentem