Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. molitur, Paulus, numerosa caede futuram
  2. ultus iam mortem, ceu uictor bella gerebat.
  3. inter mille uiros iacet ingens Phorcys ab antris
  4. Herculeae Calpes, caelatus Gorgone parmam,
  5. unde genus †tristique deae manabat origo.
  6. hunc obiectantem sese atque antiqua tumentem
  7. nomina saxificae monstrosa e stirpe Medusae,
  8. dum laeuum petit incumbens uiolentius inguen,
  9. detrahit excelsi correptum uertice coni,
  10. adflictumque premens, tergo qua balteus imo
  11. sinuatur coxaeque sedet munimen utrique,
  12. coniecto fodit ense super: uomit ille calentem
  13. sanguinis effundens per hiantia uiscera riuum
  14. et subit Aetolos Atlanticus accola campos.
  15. Has inter strages rapido terrore coorti
  16. inuadunt terga atque auerso turbine miscent
  17. bella inopina uiri, Tyrius quos fallere doctos
  18. hanc ipsam pugnae rector formarat ad artem,
  19. succinctique dolis, fugerent ceu Punica castra,
  20. dediderant dextras. tum totis mentibus actam