Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. exhalat lucem et dubitantia lumina condit.
  2. at fessus maerore simul cursuque metuque
  3. et tamen haud irae uacuus non certa per aequor
  4. interdum insistens Perusinus membra ferebat.
  5. hunc sude, quam raptam Libyci per terga iacentis
  6. armiger obtulerat monstri, super inguina fixam,
  7. obtruncat quercuque premit uiolentus obusta.
  8. temptarat precibus saeuum lenire furorem,
  9. sed Stygius primos impleuit feruor hiatus,
  10. et pulmone tenus demisit anhelitus ignem.
  11. tandem cum toto cecidit grege, nomen in Vmbro
  12. clarum, Crista, diu populo: ceu fulmine celsa
  13. aesculus aut proauis ab origine cognita quercus
  14. cum fumat percussa Ioui, sacrosque per aeuum
  15. aetherio ramos populantur sulphure flammae,
  16. donec uicta deo late procumbit et omnem
  17. conlabens operit spatioso stipite prolem.