Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. semina fumarent belli, uestraene Sagunto
  2. spernendum consanguineam protendere dextram?
  3. per uos culta diu Rutulae primordia gentis
  4. Laurentemque larem et genetricis pignora Troiae,
  5. conseruate pios, qui permutare coacti
  6. Acrisioneis Tirynthia culmina muris.
  7. uos etiam Zanclen Siculi contra arma tyranni
  8. iuuisse egregium, uos et Campana tueri
  9. moenia, depulso Samnitum robore, dignum
  10. Sigeis duxistis auis. uetus incola Dauni,
  11. testor uos, fontes et stagna arcana Numici,
  12. cum felix nimium dimitteret Ardea pubem,
  13. sacra domumque ferens et aui penetralia Turni
  14. ultra Pyrenen Laurentia nomina duxi.
  15. cur ut decisa atque auulsa a corpore membra
  16. despiciar, nosterque luat cur foedera sanguis?’
  17. Tandem, ut finitae uoces, (miserabile uisu)
  18. summissi palmas, lacerato tegmine uestis,
  19. adfigunt proni squalentia corpora terrae.
  20. inde agitant consulta patres curasque fatigant.