Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. culminibus, Latiaeque ualent succurrere classes.’
  2. Talibus inlacrimant noctemque diemque querelis,
  3. donec Laurentis puppis defertur ad oras,
  4. qua pater acceptis Anienis ditior undis
  5. in pontum flauo descendit gurgite Thybris.
  6. hinc consanguineae subeunt iam moenia Romae.
  7. Concilium uocat augustum castaque beatos
  8. paupertate patres ac nomina parta triumphis
  9. consul et aequantem superos uirtute senatum.
  10. facta animosa uiros et recti sacra cupido
  11. attollunt, hirtaeque togae neglectaque mensa
  12. dexteraque a curuis capulo non segnis aratris.
  13. exiguo faciles et opum non indiga corda,
  14. ad paruos curru remeabant saepe penates.