Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. tormentis excussa tenent. ut tegmina primum
  2. fulgentis galeae conspexit et arma cruento
  3. contra solem auro rutilantia, turbidus infit:
  4. ‘En, qui res Libycas inceptaque tanta retardet,
  5. Romani Murrus belli mora. foedera, faxo,
  6. iam noscas, quid uana queant et uester Hiberus.
  7. fer tecum castamque fidem seruataque iura:
  8. deceptos mihi linque deos.’ cui talia Murrus:
  9. ‘Exoptatus ades. mens olim proelia poscit
  10. speque tui flagrat capitis: fer debita fraudum
  11. praemia et Italiam tellure inquire sub ima.
  12. longum in Dardanios finis iter atque niualem
  13. Pyrenen Alpesque tibi mea dextera donat.’
  14. Haec inter cernens subeuntem comminus hostem
  15. praeruptumque loci fidum sibi, corripit ingens
  16. aggere conuulso saxum et nitentis in ora
  17. deuoluit, pronoque silex ruit incitus ictu.
  18. subsedit duro concussus fragmine muri.
  19. tum pudor accendit mentem, nec conscia fallit
  20. uirtus pressa loco; frendens luctatur et aegro