Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. his acuit stimulis subicitque haud mollia dictu:
  2. ‘Romanos terra atque undis, ubi competet aetas,
  3. ferro ignique sequar Rhoeteaque fata reuoluam.
  4. non superi mihi, non Martem cohibentia pacta,
  5. non celsae obstiterint Alpes Tarpeiaque saxa.
  6. hanc mentem iuro nostri per numina Martis,
  7. per manes, regina, tuos.’ tum nigra triformi
  8. hostia mactatur diuae, raptimque recludit
  9. spirantis artus poscens responsa sacerdos
  10. ac fugientem animam properatis consulit extis.
  11. Ast ubi quaesitas artis de more uetustae
  12. intrauit mentes superum, sic deinde profatur:
  13. ‘Aetolos late consterni milite campos
  14. Idaeoque lacus flagrantis sanguine cerno.