Epistulae

Fas est et carmine remitti, non dico continuo et longo - id enim perfici nisi in otio non potest -, sed hoc arguto et brevi, quod apte quantas libet occupationes curasque distinguit.

Lusus vocantur; sed hi lusus non minorem interdum gloriam quam seria consequuntur. Atque adeo - cur enim te ad versus non versibus adhorter? -

ut laus est cerae, mollis cedensque sequatur si doctos digitos iussaque fiat opus

et nunc informet Martem castamve Minervam, nunc Venerem effingat, nunc Veneris puerum;

utque sacri fontes non sola incendia sistunt, saepe etiam flores vernaque prata iuvant,

sic hominum ingenium flecti ducique per artes non rigidas docta mobilitate decet.