Epistulae

Pliny, the Younger

Pliny, the Younger, creator;

Numquam a poetice - altius enim repetam - alienus fui; quin etiam quattuordecim natus annos Graecam tragoediam scripsi. 'Qualem?' inquis. Nescio; tragoedia vocabatur.

Mox, cum e militia rediens in Icaria insula ventis detinerer, Latinos elegos in illud ipsum mare ipsamque insulam feci. Expertus sum me aliquando et heroo, hendecasyllabis nunc primum, quorum hic natalis haec causa est. Legebantur in Laurentino mihi libri Asini Galli de comparatione patris et Ciceronis. Incidit epigramma Ciceronis in Tironem suum.

Dein cum meridie - erat enim aestas - dormiturus me recepissem, nec obreperet somnus, coepi reputare maximos oratores hoc studii genus et in oblectationibus habuisse et in laude posuisse.

Intendi animum contraque opinionem meam post longam desuetudinem perquam exiguo temporis momento id ipsum, quod me ad scribendum sollicitaverat, his versibus exaravi:

  • Cum libros Galli legerem, quibus ille parenti
  • ausus de Cicerone dare est palmamque decusque,
  • lascivum inveni lusum Ciceronis et illo
  • spectandum ingenio, quo seria condidit et quo
  • humanis salibus multo varioque lepore
  • magnorum ostendit mentes gaudere virorum.
  • Nam queritur quod fraude mala frustratus amantem
  • paucula cenato sibi debita savia Tiro
  • tempore nocturno subtraxerit.
  • His ego lectis
  • 'cur post haec' inquam 'nostros celamus amores
  • nullumque in medium timidi damus atque fatemur
  • Tironisque dolos, Tironis nosse fugaces
  • blanditias et furta novas addentia flammas?'