Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quid fecere mali nostrae tibi, saeve, lacernae,
  2. Tollere de scapulis quas levis aura potest?
  3. Quanto simplicius, quanto est humanius illud,
  4. Mense vel Augusto sumere gausapinas!
  1. Laudat, amat, cantat nostros mea Roma libellos,
  2. Meque sinus omnes, me manus omnis habet.
  3. Ecce rubet quidam, pallet, stupet, oscitat, odit.
  4. Hoc volo: nunc nobis carmina nostra placent.
  1. Rem factam Pompullus habet, Faustine: legetur
  2. Et nomen toto sparget in orbe suum.
  3. 'Sic leve flavorum valeat genus Usiporum,
  4. Quisquis et Ausonium non amat imperium.'
  5. Ingeniosa tamen Pompulli scripta feruntur.
  6. 'Sed famae non est hoc, mihi crede, satis:
  7. Quam multi tineas pascunt blattasque diserti,
  8. Et redimunt soli carmina docta coci!
  9. Nescio quid plus est, quod donat saecula chartis:
  10. Victurus genium debet habere liber.'
  1. Amisit pater unicum Salanus:
  2. Cessas munera mittere, Oppiane?