Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Sic tua non intrent vetuli pomaria fures,
  2. Sed puer et longis pulchra puella comis.
  1. Cinnam, Cinname, te iubes vocari.
  2. Non est hic, rogo, Cinna, barbarismus?
  3. Tu si Furius ante dictus esses,
  4. Fur ista ratione dicereris.
  1. Sancta Salonini terris requiescit Hiberis,
  2. Qua melior Stygias non videt umbra domos.
  3. Sed lugere nefas: nam qui te, Prisce, reliquit,
  4. Vivit qua voluit vivere parte magis.