Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quod nec carmine glorior supino
  2. Nec retro lego Sotaden cinaedum,
  3. Nusquam Graecula quod recantat echo
  4. Nec dictat mihi luculentus Attis
  5. Mollem debilitate galliambon:
  6. Non sum, Classice, tam malus poeta.
  7. Quid si per gracilis vias petauri
  8. Invitum iubeas subire Ladan?
  9. Turpe est difficiles habere nugas
  10. Et stultus labor est ineptiarum.
  11. Scribat carmina circulis Palaemon,
  12. Me raris iuvat auribus placere.
  1. Dicis amore tui bellas ardere puellas,
  2. Qui faciem sub aqua, Sexte, natantis habes.
  1. Nil recitas et vis, Mamerce, poeta videri.
  2. Quidquid vis esto, dummodo nil recites.
  1. Quod nimio gaudes noctem producere vino,
  2. Ignosco: vitium, Gaure, Catonis habes.
  3. Carmina quod scribis Musis et Apolline nullo,
  4. Laudari debes: hoc Ciceronis habes:
  5. Quod vomis, Antoni: quod luxuriaris, Apici.
  6. Quod fellas, vitium dic mihi cuius habes?
  1. Quintiliane, vagae moderator summe iuventae,
  2. Gloria Romanae, Quintiliane, togae,
  3. Vivere quod propero pauper nec inutilis annis,
  4. Da veniam: properat vivere nemo satis.
  5. Differat hoc, patrios optat qui vincere census
  6. Atriaque inmodicis artat imaginibus.
  7. Me focus et nigros non indignantia fumos
  8. Tecta iuvant et fons vivos et herba rudis.
  9. Sit mihi verna satur, sit non doctissima coniunx,
  10. Sit nox cum somno, sit sine lite dies.
  1. Rerum certa salus, terrarum gloria, Caesar,
  2. Sospite quo magnos credimus esse deos,
  3. Si festinatis totiens tibi lecta libellis
  4. Detinuere oculos carmina nostra tuos,
  5. Quod fortuna vetat fieri, permitte videri,
  6. Natorum genitor credar ut esse trium.
  7. Haec, si displicui, fuerint solacia nobis;
  8. Haec fuerint nobis praemia, si placui.
  1. Natorum mihi ius trium roganti
  2. Musarum pretium dedit mearum
  3. Solus qui poterat. Valebis, uxor.
  4. Non debet domini perire munus.
  1. 'Primus ubi est' inquis 'cum sit liber iste secundus?'
  2. Quid faciam, si plus ille pudoris habet?
  3. Tu tamen hunc fieri si mavis, Regule, primum,
  4. Unum de titulo tollere iota potes.
  1. Hoc tibi quidquid id est longinquis mittit ab oris
  2. Gallia Romanae nomine dicta togae.
  3. Hunc legis et laudas librum fortasse priorem:
  4. Illa vel haec mea sunt, quae meliora putas.
  5. Plus sane placeat domina qui natus in urbe est:
  6. Debet enim Gallum vincere verna liber.
  1. Cuius vis fieri, libelle, munus?
  2. Festina tibi vindicem parare,
  3. Ne nigram cito raptus in culinam
  4. Cordylas madida tegas papyro
  5. Vel turis piperisve sis cucullus.
  6. Faustini fugis in sinum? sapisti.
  7. Cedro nunc licet ambules perunctus
  8. Et frontis gemino decens honore
  9. Pictis luxurieris umbilicis,
  10. Et te purpura delicata velet,
  11. Et cocco rubeat superbus index.
  12. Illo vindice nec Probum timeto.