Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. At nunc succincti quae sint bona disce libelli.
  2. Hoc primum est, brevior quod mihi charta perit;
  3. Deinde, quod haec una peraget librarius hora,
  4. Nec tantum nugis serviet ille meis;
  5. Tertia res haec est, quod si cui forte legeris,
  6. Sis licet usque malus, non odiosus eris.
  7. Te conviva leget mixto quincunce, sed ante
  8. Incipiat positus quam tepuisse calix.
  9. Esse tibi tanta cautus brevitate videris?
  10. Ei mihi, quam multis sic quoque longus eris!
  1. Creta dedit magnum, maius dedit Africa nomen,
  2. Scipio quod victor quodque Metellus habet;
  3. Nobilius domito tribuit Germania Rheno,
  4. Et puer hoc dignus nomine, Caesar, eras.
  5. Frater Idumaeos meruit cum patre triumphos,
  6. Quae datur ex Chattis laurea, tota tua est.
  1. Sexte, nihil debes, nil debes, Sexte, fatemur.
  2. Debet enim, si quis solvere, Sexte, potest.
  1. O quam blandus es, Ammiane, matri!
  2. Quam blanda est tibi mater, Ammiane!
  3. Fratrem te vocat et soror vocatur.
  4. Cur vos nomina nequiora tangunt?
  5. Quare non iuvat hoc quod estis esse?
  6. Lusum creditis hoc iocumque? Non est:
  7. Matrem, quae cupit esse se sororem,
  8. Nec matrem iuvat esse nec sororem.
  1. Ne valeam, si non totis, Deciane, diebus
  2. Et tecum totis noctibus esse velim.
  3. Sed duo sunt quae nos disiungunt milia passum:
  4. Quattuor haec fiunt, cum rediturus eam.
  5. Saepe domi non es, cum sis quoque, saepe negaris:
  6. Vel tantum causis vel tibi saepe vacas.
  7. Te tamen ut videam, duo milia non piget ire:
  8. Ut te non videam, quattuor ire piget.
  1. I nunc, edere me iube libellos.
  2. Lectis vix tibi paginis duabus
  3. Spectas eschatocollion, Severe,
  4. Et longas trahis oscitationes.
  5. Haec sunt, quae relegente me solebas
  6. Rapta exscribere, sed Vitellianis,
  7. Haec sunt, singula quae sinu ferebas
  8. Per convivia cuncta, per theatra,
  9. Haec sunt aut meliora si qua nescis.
  10. Quid prodest mihi tam macer libellus,
  11. Nullo crassior ut sit umbilico,
  12. Si totus tibi triduo legatur?
  13. Numquam deliciae supiniores.
  14. Lassus tam cito deficis viator,
  15. Et cum currere debeas Bovillas,
  16. Interiungere quaeris ad Camenas?