Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quid quaeris aedes vilicesque derides,
  2. Habitare gratis, o Vacerra, cum possis?
  3. Haec sarcinarum pompa convenit ponti.
  1. Ut pueros emeret Labienus vendidit hortos.
  2. Nil nisi ficetum nunc Labienus habet.
  1. Triginta mihi quattuorque messes
  2. Tecum, si memini, fuere, Iuli.
  3. Quarum dulcia mixta sunt amaris,
  4. Sed iucunda tamen fuere plura;
  5. Et si calculus omnis huc et illuc
  6. Diversus bicolorque digeratur,
  7. Vincet candida turba nigriorem.
  8. Si vitare velis acerba quaedam
  9. Et tristis animi cavere morsus,
  10. Nulli te facias nimis sodalem:
  11. Gaudebis minus et minus dolebis.
  1. Tamquam simpliciter mecum, Callistrate, vivas,
  2. Dicere percisum te mihi saepe soles.
  3. Non es tam simplex, quam vis, Callistrate, credi.
  4. Nam quisquis narrat talia, plura tacet.
  1. Libras quattuor aut duas amico
  2. Algentemque togam brevemque laenam,
  3. Interdum aureolos manu crepantis,
  4. Possint ducere qui duas Kalendas,
  5. Quod nemo, nisi tu, Labulle, donas,
  6. Non es, crede mihi, bonus. Quid ergo?
  7. Ut verum loquar, optimus malorum es.
  8. Pisones Senecasque Memmiosque
  9. Et Crispos mihi redde, sed priores:
  10. Fies protinus ultimus bonorum.
  11. Vis cursu pedibusque gloriari?
  12. Tigrim vince levemque Passerinum:
  13. Nulla est gloria praeterire asellos.
  1. Nasutus nimium cupis videri.
  2. Nasutum volo, nolo polyposum.
  1. Hunc qui femineis noctesque diesque cathedris
  2. Incedit tota notus in urbe nimis,
  3. Crine nitens, niger unguento, perlucidus ostro,
  4. Ore tener, latus pectore, crure glaber,
  5. Uxori qui saepe tuae comes inprobus haeret,
  6. Non est quod timeas, Candide: non futuit.
  1. Odi te, quia bellus es, Sabelle.
  2. Res est putida bellus et Sabellus.
  3. Bellum denique malo, quam Sabellum.
  4. Tabescas utinam, Sabelle belle!
  1. Mentiris, credo: recitas mala carmina, laudo:
  2. Cantas, canto: bibis, Pontiliane, bibo:
  3. Pedis, dissimulo: gemma vis ludere, vincor:
  4. Res una est, sine me quam facis, et taceo.
  5. Nil tamen omnino praestas mihi. 'Mortuus,' inquis,
  6. 'Accipiam bene te.' Nil volo: sed morere.
  1. Non est, Tucca, satis, quod es gulosus:
  2. Et dici cupis et cupis videri.
  1. Barbatus rigido nupsit Callistratus Afro,
  2. Hac qua lege viro nubere virgo solet.
  3. Praeluxere faces, velarunt flammea vultus,
  4. Nec tua defuerunt verba, Talasse, tibi.
  5. Dos etiam dicta est. Nondum tibi, Roma, videtur
  6. Hoc satis? expectas numquid ut et pariat?
  1. Facundos mihi de libidinosis
  2. Legisti nimium, Sabelle, versus,
  3. Quales nec Didymi sciunt puellae
  4. Nec molles Elephantidos libelli.
  5. Sunt illic Veneris novae figurae,
  6. Quales perditus audeat fututor,
  7. Praestent et taceant quid exoleti,
  8. Quo symplegmate quinque copulentur,
  9. Qua plures teneantur a catena,
  10. Extinctam liceat quid ad lucernam.
  11. Tanti non erat, esse te disertum.
  1. Unice, cognato iunctum mihi sanguine nomen
  2. Qui geris et studio corda propinqua meis;
  3. Carmina cum facias soli cedentia fratri,
  4. Pectore non minor es, sed pietate prior.
  5. Lesbia cum lepido te posset amare Catullo,
  6. Te post Nasonem blanda Corinna sequi.
  7. Nec deerant zephyri, si te dare vela iuvaret;
  8. Sed tu litus amas. Hoc quoque fratris habes.
  1. Haedina tibi pelle contegenti
  2. Nudae tempora verticemque calvae,
  3. Festive tibi, Phoebe, dixit ille,
  4. Qui dixit caput esse calceatum.
  1. Difficilis facilis, iucundus acerbus es idem:
  2. Nec tecum possum vivere, nec sine te.
  1. Vendunt carmina Gallus et Lupercus.
  2. Sanos, Classice, nunc nega poetas.
  1. Boletos et aprum si tamquam vilia ponis
  2. Et non esse putas haec mea vota, volo:
  3. Si fortunatum fieri me credis et heres
  4. Vis scribi propter quinque Lucrina, vale.
  5. Lauta tamen cena est: fateor, lautissima, sed cras
  6. Nil erit, immo hodie, protinus immo nihil,
  7. Quod sciat infelix damnatae spongia virgae
  8. Vel quicumque canis iunctaque testa viae:
  9. Mullorum leporumque et suminis exitus hic est,
  10. Sulphureusque color carnificesque pedes.
  11. Non Albana mihi sit comissatio tanti
  12. Nec Capitolinae pontificumque dapes;
  13. Inputet ipse deus nectar mihi, fiet acetum
  14. Et Vaticani perfida vappa cadi.
  15. Convivas alios cenarum quaere magister,
  16. Quos capiant mensae regna superba tuae:
  17. Me meus ad subitas invitet amicus ofellas:
  18. Haec mihi, quam possum reddere, cena placet.
  1. Crinitae Line paedagoge turbae,
  2. Rerum quem dominum vocat suarum
  3. Et credit cui+ Postumilla dives
  4. Gemmas, aurea, vina, concubinos:
  5. Sic te perpetua fide probatum
  6. Nulli non tua praeferat patrona:
  7. Succurras misero, precor, furori
  8. Et serves aliquando neglegenter
  9. Illos qui male cor meum perurunt,
  10. Quos et noctibus et diebus opto
  11. In nostro cupidus sinu videre,
  12. Formosos, niveos, pares, gemellos,
  13. Grandes, non pueros, sed uniones.
  1. Daphnonas, platanonas et ae+rios pityonas
  2. Et non unius balnea solus habes,
  3. Et tibi centenis stat porticus alta columnis,
  4. Calcatusque tuo sub pede lucet onyx,
  5. Pulvereumque fugax hippodromon ungula plaudit,
  6. Et pereuntis aquae fluctus ubique sonat;
  7. Atria longa patent. Sed nec cenantibus usquam
  8. Nec somno locus est. Quam bene non habitas!
  1. Tam saepe nostrum decipi Fabullinum,
  2. Miraris, Aule? semper homo bonus tiro est.
  1. Tempora Pieria solitus redimire corona,
  2. Nec minus attonitis vox celebrata reis,
  3. Hic situs est, hic ille tuus, Sempronia, Rufus,
  4. Cuius et ipse tui flagrat amore cinis.
  5. Dulcis in Elysio narraris fabula campo,
  6. Et stupet ad raptus Tyndaris ipsa tuos:
  7. Tu melior, quae deserto raptore redisti,
  8. Illa virum voluit nec repetita sequi.
  9. Ridet et Iliacos audit Menelaus amores:
  10. Absolvit Phrygium vestra rapina Parim.
  11. Accipient olim cum te loca laeta piorum,
  12. Non erit in Stygia notior umbra domo:
  13. Non aliena videt, sed amat Proserpina raptas:
  14. Iste tibi dominam conciliabit amor.
  1. Nummi cum tibi sint opesque tantae,
  2. Quantas civis habet, Paterne, rarus,
  3. Largiris nihil incubasque gazae,
  4. Ut magnus draco, quem canunt poetae
  5. Custodem Scythici fuisse luci.
  6. Sed causa, ut memoras et ipse iactas,
  7. Dirae filius est rapacitatis.
  8. Ecquid tu fatuos rudesque quaeris,
  9. Inludas quibus auferasque mentem?