Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quod sanare Criton, non quod Hygia potest:
  2. At Chione non sentit opus nec vocibus ullis
  3. Adiuvat, absentem marmoreamve putes.
  4. Exorare, dei, si vos tam magna liceret
  5. Et bona velletis tam pretiosa dare,
  6. Hoc quod habet Chione corpus faceretis haberet
  7. Ut Phlogis, et Chione quod Phlogis ulcus habet.
  1. Lingua maritus, moechus ore Nanneius,
  2. Summemmianis inquinatior buccis;
  3. Quem cum fenestra vidit a Suburana
  4. Obscena nudum Leda, fornicem cludit
  5. Mediumque mavult basiare, quam summum;
  6. Modo qui per omnes viscerum tubos ibat
  7. Et voce certa consciaque dicebat,
  8. Puer an puella matris esset in ventre:
  9. —Gaudete cunni; vestra namque res acta est—
  10. Arrigere linguam non potest fututricem.
  11. Nam dum tumenti mersus haeret in volva
  12. Et vagientes intus audit infantes,
  13. Partem gulosam solvit indecens morbus.
  14. Nec purus esse nunc potest nec inpurus.
  1. Lesbia se iurat gratis numquam esse fututam.
  2. Verum est. Cum futui vult, numerare solet.
  1. Spectas nos, Philomuse, cum lavamur,
  2. Et quare mihi tam mutuniati
  3. Sint leves pueri, subinde quaeris.
  4. Dicam simpliciter tibi roganti:
  5. Pedicant, Philomuse, curiosos.
  1. Nescio tam multis quid scribas, Fauste, puellis:
  2. Hoc scio, quod scribit nulla puella tibi.
  1. Sescenti cenant a te, Iustine, vocati
  2. Lucis ad officium quae tibi prima fuit.
  3. Inter quos, memini, non ultimus esse solebam;
  4. Nec locus hic nobis invidiosus erat.
  5. Postera sed festae reddis sollemnia mensae:
  6. Sescentis hodie, cras mihi natus eris.
  1. Et delator es et calumniator,
  2. Et fraudator es et negotiator,
  3. Et fellator es et lanista. Miror
  4. Quare non habeas, Vacerra, nummos.
  1. Nil mihi das vivus; dicis post fata daturum.
  2. Si non es stultus, scis, Maro, quid cupiam.
  1. Parva rogas magnos; sed non dant haec quoque magni.
  2. Ut pudeat levius te, Matho, magna roga.
  1. Amphitheatrales inter nutrita magistros
  2. Venatrix, silvis aspera, blanda domi,
  3. Lydia dicebar, domino fidissima Dextro,
  4. Qui non Erigones mallet habere canem,
  5. Nec qui Dictaea Cephalum de gente secutus
  6. Luciferae pariter venit ad astra deae.
  7. Non me longa dies nec inutilis abstulit aetas,
  8. Qualia Dulichio fata fuere cani:
  9. Fulmineo spumantis apri sum dente perempta,
  10. Quantus erat, Calydon, aut, Erymanthe, tuus.
  11. Nec queror infernas quamvis cito rapta sub umbras:
  12. Non potui fato nobiliore mori.
  1. Vendere, Tucca, potes centenis milibus emptos?
  2. Plorantis dominos vendere, Tucca, potes?
  3. Nec te blanditiae, nec verba rudesve querellae,
  4. Nec te dente tuo saucia colla movent?
  5. A facinus! tunica patet inguen utrimque levata,
  6. Inspiciturque tua mentula facta manu.
  7. Si te delectat numerata pecunia, vende
  8. Argentum, mensas, murrina, rura, domum;
  9. Vende senes servos, ignoscent, vende paternos:
  10. Ne pueros vendas, omnia vende, miser.
  11. Luxuria est emere hos—quis enim dubitatve negatve?—,
  12. Sed multo maior vendere luxuria est.
  1. Hystericam vetulo se dixerat esse marito
  2. Et queritur futui Leda necesse sibi;
  3. Sed flens atque gemens tanti negat esse salutem
  4. Seque refert potius proposuisse mori.
  5. Vir rogat, ut vivat virides nec deserat annos,
  6. Et fieri, quod iam non facit ipse, sinit.
  7. Protinus accedunt medici medicaeque recedunt,
  8. Tollunturque pedes. O medicina gravis!
  1. Drauci Natta sui vocat pipinnam,
  2. Collatus cui+ Gallus est Priapus.
  1. Venturum iuras semper mihi, Lygde, roganti
  2. Constituisque horam constituisque locum.
  3. Cum frustra iacui longa prurigine tentus,
  4. Succurrit pro te saepe sinistra mihi.
  5. Quid precer, o fallax, meritis et moribus istis?
  6. Umbellam luscae, Lygde, feras dominae.
  1. Curandum penem commisit Baccara Raetus
  2. Rivali medico. Baccara Gallus erit.
  1. Theca tectus ahenea lavatur
  2. Tecum, Caelia, servus; ut quid, oro,
  3. Non sit cum citharoedus aut choraules?
  4. Non vis, ut puto, mentulam videre.
  5. Quare cum populo lavaris ergo?
  6. Omnes an tibi nos sumus spadones?
  7. Ergo, ne videaris invidere,
  8. Servo, Caelia, fibulam remitte.
  1. Solvere, Paete, decem tibi me sestertia cogis,
  2. Perdiderit quoniam Bucco ducenta tibi.
  3. Ne noceant, oro, mihi non mea crimina: tu qui
  4. Bis centena potes perdere, perde decem.
  1. In omnibus Vacerra quod conclavibus
  2. Consumit horas et die toto sedet,
  3. Cenaturit Vacerra, non cacaturit.
  1. Utere femineis conplexibus, utere, Victor,
  2. Ignotumque sibi mentula discat opus.
  3. Flammea texuntur sponsae, iam virgo paratur,
  4. Tondebit pueros iam nova nupta tuos.
  5. Pedicare semel cupido dabit illa marito,
  6. Dum metuit teli vulnera prima novi:
  7. Saepius hoc fieri nutrix materque vetabunt
  8. Et dicent 'Uxor, non puer, ista tibi est.'
  9. Heu quantos aestus, quantos patiere labores,
  10. Si fuerit cunnus res peregrina tibi!
  11. Ergo Suburanae tironem trade magistrae.
  12. Illa virum faciet; non bene virgo docet.
  1. Ad primum decuma lapidem quod venimus hora,
  2. Arguimur lentae crimine pigritiae.
  3. Non est ista viae, non est mea, sed tua culpa est,
  4. Misisti mulas qui mihi, Paete, tuas.
  1. Litus beatae Veneris aureum Baias,
  2. Baias superbae blanda dona Naturae,
  3. Ut mille laudem, Flacce, versibus Baias,
  4. Laudabo digne non satis tamen Baias.
  5. Sed Martialem malo, Flacce, quam Baias.
  6. Optare utrumque pariter, inprobi votum est.
  7. Quod si deorum munere hoc tibi detur,
  8. Quid gaudiorum est Martialis et Baiae!
  1. Cum sene communem vexat spado Dindymus Aeglen,
  2. Et iacet in medio sicca puella toro.
  3. Viribus hic, operi non est hic utilis annis:
  4. Ergo sine effectu prurit utrique labor.
  5. Supplex illa rogat pro se miserisque duobus,
  6. Hunc iuvenem facias, hunc, Cytherea, virum.
  1. A Sinuessanis conviva Philostratus undis
  2. Conductum repetens nocte iubente larem
  3. Paene imitatus obi=t saevis Elpenora fatis,
  4. Praeceps per longos dum ruit usque gradus.
  5. Non esset, Nymphae, tam magna pericula passus,
  6. Si potius vestras ille bibisset aquas.
  1. Nemo habitat gratis nisi dives et orbus apud te.
  2. Nemo domum pluris, Sosibiane, locat.
  1. Qui nondum Stygias descendere quaerit ad umbras,
  2. Tonsorem fugiat, si sapit, Antiochum.
  3. Alba minus saevis lacerantur bracchia cultris,
  4. Cum furit ad Phrygios enthea turba modos;
  5. Mitior inplicitas Alcon secat enterocelas
  6. Fractaque fabrili dedolat ossa manu.
  7. Tondeat hic inopes Cynicos et Stoica menta
  8. Collaque pulverea nudet equina iuba.
  9. Hic miserum Scythica sub rupe Promethea radat,
  10. Carnificem duro pectore poscet avem;
  11. Ad matrem fugiet Pentheus, ad Maenadas Orpheus,
  12. Antiochi tantum barbara tela sonent.
  13. Haec quaecumque meo numeratis stigmata mento,
  14. In vetuli pyctae qualia fronte sedent,
  15. Non iracundis fecit gravis unguibus uxor:
  16. Antiochi ferrum est et scelerata manus.
  17. Unus de cunctis animalibus hircus habet cor:
  18. Barbatus vivit, ne ferat Antiochum.
  1. Sidere percussa est subito tibi, Zoile, lingua,
  2. Dum lingis. Certe, Zoile, nunc futues.
  1. Leniat ut fauces medicus, quas aspera vexat
  2. Adsidue tussis, Parthenopaee, tibi,
  3. Mella dari nucleosque iubet dulcesque placentas
  4. Et quidquid pueros non sinit esse truces.
  5. At tu non cessas totis tussire diebus.
  6. Non est haec tussis, Parthenopaee, gula est.
  1. Dives eras quondam: sed tunc pedico fuisti,
  2. Et tibi nulla diu femina nota fuit.
  3. Nunc sectaris anus. O quantum cogit egestas!
  4. Illa fututorem te, Charideme, facit.
  1. Multis iam, Lupe, posse se diebus
  2. Pedicare negat Charisianus.
  3. Causam cum modo quaererent sodales,
  4. Ventrem dixit habere se solutum.
  1. Intactas quare mittis mihi, Polla, coronas?
  2. A te vexatas malo tenere rosas.
  1. Carmina nulla probas molli quae limite currunt,
  2. Sed quae per salebras altaque saxa cadunt,
  3. Et tibi Maeonio res carmine maior habetur
  4. 'Lucili columella hic situ Metrophanes;'
  5. Attonitusque legis 'terrai+ frugiferai+,'
  6. Accius et quidquid Pacuviusque vomunt.
  7. Vis imiter veteres, Chrestille, tuosque poetas?
  8. Dispeream, ni scis, mentula quid sapiat.
  1. Aeolidos Canace iacet hoc tumulata sepulchro,
  2. Ultima cui parvae septima venit hiems.
  3. A scelus, a facinus! properas qui flere, viator,
  4. Non licet hic vitae de brevitate queri:
  5. Tristius est leto leti genus: horrida vultus
  6. Abstulit et tenero sedit in ore lues,
  7. Ipsaque crudeles ederunt oscula morbi,
  8. Nec data sunt nigris tota labella rogis.
  9. Si tam praecipiti fuerant ventura volatu,
  10. Debuerant alia fata venire via.
  11. Sed mors vocis iter properavit cludere blandae,
  12. Ne posset duras flectere lingua deas.
  1. Mentitur qui te vitiosum, Zoile, dicit.
  2. Non vitiosus homo es, Zoile, sed vitium.
  1. Pierios vatis Theodori flamma penates
  2. Abstulit. Hoc Musis et tibi, Phoebe, placet?
  3. O scelus, o magnum facinus crimenque deorum,
  4. Non arsit pariter quod domus et dominus!
  1. Quod nimium lives nostris et ubique libellis
  2. Detrahis, ignosco: verpe poeta, sapis.
  3. Hoc quoque non curo, quod cum mea carmina carpas,
  4. Conpilas: et sic, verpe poeta, sapis.
  5. Illud me cruciat, Solymis quod natus in ipsis
  6. Pedicas puerum, verpe poeta, meum.
  7. Ecce negas iurasque mihi per templa Tonantis.
  8. Non credo: iura, verpe, per Anchialum.
  1. Incideris quotiens in basia fellatorum,
  2. In solium puta te mergere, Flacce, caput.
  1. Marcia, non Rhenus, salit hic, Germane: quid obstas
  2. Et puerum prohibes divitis imbre lacus?
  3. Barbare, non debet, submoto cive, ministro