Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quincunces et sex cyathos besemque bibamus,
  2. Gaius ut fiat Iulius et Proculus.
  1. Zoile, quid tota gemmam praecingere libra
  2. Te iuvat et miserum perdere sardonycha?
  3. Anulus iste tuis fuerat modo cruribus aptus:
  4. Non eadem digitis pondera conveniunt.
  1. Mulio viginti veni=t modo milibus, Aule.
  2. Miraris pretium tam grave? surdus erat.
  1. Cunarum fueras motor, Charideme, mearum
  2. Et pueri custos adsiduusque comes.
  3. Iam mihi nigrescunt tonsa sudaria barba
  4. Et queritur labris puncta puella meis;
  5. Sed tibi non crevi: te noster vilicus horret,
  6. Te dispensator, te domus ipsa pavet.
  7. Ludere nec nobis, nec tu permittis amare;
  8. Nil mihi vis et vis cuncta licere tibi.
  9. Corripis, observas, quereris, suspiria ducis,
  10. Et vix a ferulis temperat ira tua.
  11. Si Tyrios sumpsi cultus unxive capillos,
  12. Exclamas 'Numquam fecerat ista pater';
  13. Et numeras nostros adstricta fronte trientes,
  14. Tamquam de cella sit cadus ille tua.
  15. Desine; non possum libertum ferre Catonem.
  16. Esse virum iam me dicet amica tibi.
  1. Formosam Glyceran amat Lupercus
  2. Et solus tenet imperatque solus.
  3. Quam toto sibi mense non fututam
  4. Cum tristis quereretur et roganti
  5. Causam reddere vellet Aeliano,
  6. Respondit, Glycerae dolere dentes.
  1. Indulget pecori nimium dum pastor Amyntas
  2. Et gaudet fama luxuriaque gregis,
  3. Cedentes oneri ramos silvamque fluentem
  4. Vicit, concussas ipse secutus opes.
  5. Triste nemus dirae vetuit superesse rapinae
  6. Damnavitque rogis noxia ligna pater.
  7. Pingues, Lygde, sues habeat vicinus Iollas:
  8. Te satis est nobis adnumerare pecus.
  1. Vivida cum poscas epigrammata, mortua ponis
  2. Lemmata. Quid fieri, Caeciliane, potest?
  3. Mella iubes Hyblaea tibi vel Hymettia nasci,
  4. Et thyma Cecropiae Corsica ponis api!
  1. Deprensum in puero tetricis me vocibus, uxor,
  2. Corripis et culum te quoque habere refers.
  3. Dixit idem quotiens lascivo Iuno Tonanti!
  4. Ille tamen grandi cum Ganymede iacet.
  5. Incurvabat Hylan posito Tirynthius arcu:
  6. Tu Megaran credis non habuisse natis?
  7. Torquebat Phoebum Daphne fugitiva: sed illas
  8. Oebalius flammas iussit abire puer.
  9. Brisei+s multum quamvis aversa iaceret,
  10. Aeacidae propior levis amicus erat.
  11. Parce tuis igitur dare mascula nomina rebus,
  12. Teque puta cunnos, uxor, habere duos.
  1. Orbus es et locuples et Bruto consule natus:
  2. Esse tibi veras credis amicitias?
  3. Sunt verae, sed quas iuvenis, quas pauper habebas.
  4. Qui novus est, mortem diligit ille tuam.
  1. Intrasti quotiens inscriptae limina cellae,
  2. Seu puer arrisit sive puella tibi,
  3. Contentus non es foribus veloque seraque,
  4. Secretumque iubes grandius esse tibi:
  5. Oblinitur minimae si qua est suspicio rimae
  6. Punctaque lasciva quae terebrantur acu.
  7. Nemo est tam teneri tam sollicitique pudoris,
  8. Qui vel pedicat, Canthare, vel futuit.
  1. Iam nisi per somnum non arrigis et tibi, Mevi,
  2. Incipit in medios meiere verpa pedes,
  3. Truditur et digitis pannucea mentula lassis
  4. Nec levat extinctum sollicitata caput.
  5. Quid miseros frustra cunnos culosque lacessis?
  6. Summa petas: illic mentula vivit anus.
  1. Omnia femineis quare dilecta catervis
  2. Balnea devitat Lattara? Ne futuat.
  3. Cur nec Pompeia lentus spatiatur in umbra,
  4. Nec petit Inachidos limina? Ne futuat.
  5. Cur Lacedaemonio luteum ceromate corpus
  6. Perfundit gelida Virgine? Ne futuat.
  7. Cum sic feminei generis contagia vitet,
  8. Cur lingit cunnum Lattara? Ne futuat.
  1. Silius haec magni celebrat monimenta Maronis,
  2. Iugera facundi qui Ciceronis habet.
  3. Heredem dominumque sui tumulive larisve
  4. Non alium mallet nec Maro nec Cicero.
  1. Nulla est hora tibi qua non me, Phylli, furentem
  2. Despolies: tanta calliditate rapis.
  3. Nunc plorat speculo fallax ancilla relicto,
  4. Gemma vel a digito vel cadit aure lapis;
  5. Nunc furtiva lucri fieri bombycina possunt,
  6. Profertur Cosmi nunc mihi siccus onyx;
  7. Amphora nunc petitur nigri cariosa Falerni,
  8. Expiet ut somnos garrula saga tuos;
  9. Nunc ut emam grandemve lupum mullumve bilibrem,
  10. Indixit cenam dives amica tibi.
  11. Sit pudor et tandem veri respectus et aequi:
  12. Nil tibi, Phylli, nego; nil mihi, Phylli, nega.
  1. Iam prope desertos cineres et sancta Maronis
  2. Nomina qui coleret, pauper et unus erat.
  3. Silius optatae succurrere censuit umbrae,
  4. Silius et vatem, non minor ipse, colit.
  1. Tanta est quae Titio columna pendet,
  2. Quantam Lampsaciae colunt puellae.
  3. Hic nullo comitante nec molesto
  4. Thermis grandibus et suis lavatur.
  5. Anguste Titius tamen lavatur.
  1. Cenabis belle, Iuli Cerialis, apud me;
  2. Condicio est melior si tibi nulla, veni.
  3. Octavam poteris servare; lavabimur una:
  4. Scis, quam sint Stephani balnea iuncta mihi.
  5. Prima tibi dabitur ventri lactuca movendo
  6. Utilis, et porris fila resecta suis,
  7. Mox vetus et tenui maior cordyla lacerto,
  8. Sed quam cum rutae frondibus ova tegant;
  9. Altera non deerunt tenui versata favilla,
  10. Et Velabrensi massa coacta foco,
  11. Et quae Picenum senserunt frigus olivae.
  12. Haec satis in gustu. Cetera nosse cupis?
  13. Mentiar, ut venias: pisces, conchylia, sumen
  14. Et chortis saturas atque paludis aves,
  15. Quae nec Stella solet rara nisi ponere cena.
  16. Plus ego polliceor: nil recitabo tibi,
  17. Ipse tuos nobis relegas licet usque Gigantas,
  18. Rura vel aeterno proxima Vergilio.
  1. Claudia caeruleis cum sit Rufina Britannis
  2. Edita, quam Latiae pectora gentis habet!
  3. Quale decus formae! Romanam credere matres
  4. Italides possunt, Atthides esse suam.
  5. Di bene, quod sancto peperit fecunda marito,
  6. Quod sperat generos quodque puella nurus.
  7. Sic placeat superis, ut coniuge gaudeat uno
  8. Et semper natis gaudeat illa tribus.
  1. Unguenta et casias et olentem funera murram
  2. Turaque de medio semicremata rogo
  3. Et quae de Stygio rapuisti cinnama lecto,
  4. Inprobe, de turpi, Zoile, redde sinu.
  5. A pedibus didicere manus peccare protervae.
  6. Non miror furem, qui fugitivus eras.
  1. Hortatur fieri quod te Lupus, Urbice, patrem,
  2. Ne credas; nihil est, quod minus ille velit.
  3. Ars est captandi quod nolis velle videri;
  4. Ne facias optat, quod rogat ut facias.
  5. Dicat praegnantem tua se Cosconia tantum:
  6. Pallidior fiet iam pariente Lupus.
  7. At tu consilio videaris ut usus amici,
  8. Sic morere, ut factum te putet esse patrem.
  1. Quod nimium mortem, Chaeremon Stoice, laudas,
  2. Vis animum mirer suspiciamque tuum?
  3. Hanc tibi virtutem fracta facit urceus ansa,
  4. Et tristis nullo qui tepet igne focus,
  5. Et teges et cimex et nudi sponda grabati,
  6. Et brevis atque eadem nocte dieque toga.
  7. O quam magnus homo es, qui faece rubentis aceti
  8. Et stipula et nigro pane carere potes!
  9. Leuconicis agedum tumeat tibi culcita lanis
  10. Constringatque tuos purpura pexa toros,
  11. Dormiat et tecum, modo qui dum Caecuba miscet
  12. Convivas roseo torserat ore puer:
  13. O quam tu cupies ter vivere Nestoris annos
  14. Et nihil ex ulla perdere luce voles!
  15. Rebus in angustis facile est contemnere vitam:
  16. Fortiter ille facit, qui miser esse potest.
  1. Miraris, docto quod carmina mitto Severo,
  2. Ad cenam cum te, docte Severe, vocem?
  3. Iuppiter ambrosia satur est et nectare vivit;
  4. Nos tamen exta Iovi cruda merumque damus.
  5. Omnia cum tibi sint dono concessa deorum,
  6. Si quod habes non vis, ergo quid accipies?
  1. Cum me velle vides tentumque, Telesphore, sentis,
  2. Magna rogas—puta me velle negare: licet?—
  3. Et nisi iuratus dixi 'dabo', subtrahis illas,
  4. Permittunt in me quae tibi multa, natis.
  5. Quid si me tonsor, cum stricta novacula supra est,
  6. Tunc libertatem divitiasque roget?
  7. Promittam; neque enim rogat illo tempore tonsor,
  8. Latro rogat; res est imperiosa timor:
  9. Sed fuerit curva cum tuta novacula theca,
  10. Frangam tonsori crura manusque simul.
  11. At tibi nil faciam, sed lota mentula lana
  12. Λαικάζειν cupidae dicet avaritiae.
  1. Senos Charinus omnibus digitis gerit,
  2. Nec nocte ponit anulos,
  3. Nec cum lavatur. Causa quae sit, quaeritis?
  4. Dactyliothecam non habet.
  1. Sit Phlogis an Chione Veneri magis apta, requiris?
  2. Pulchrior est Chione; sed Phlogis ulcus habet,
  3. Ulcus habet Priami quod tendere possit alutam
  4. Quodque senem Pelian non sinat esse senem,
  5. Ulcus habet quod habere suam vult quisque puellam,
  6. Quod sanare Criton, non quod Hygia potest:
  7. At Chione non sentit opus nec vocibus ullis
  8. Adiuvat, absentem marmoreamve putes.
  9. Exorare, dei, si vos tam magna liceret
  10. Et bona velletis tam pretiosa dare,
  11. Hoc quod habet Chione corpus faceretis haberet
  12. Ut Phlogis, et Chione quod Phlogis ulcus habet.
  1. Lingua maritus, moechus ore Nanneius,
  2. Summemmianis inquinatior buccis;
  3. Quem cum fenestra vidit a Suburana
  4. Obscena nudum Leda, fornicem cludit
  5. Mediumque mavult basiare, quam summum;
  6. Modo qui per omnes viscerum tubos ibat
  7. Et voce certa consciaque dicebat,
  8. Puer an puella matris esset in ventre:
  9. —Gaudete cunni; vestra namque res acta est—
  10. Arrigere linguam non potest fututricem.
  11. Nam dum tumenti mersus haeret in volva
  12. Et vagientes intus audit infantes,
  13. Partem gulosam solvit indecens morbus.
  14. Nec purus esse nunc potest nec inpurus.
  1. Lesbia se iurat gratis numquam esse fututam.
  2. Verum est. Cum futui vult, numerare solet.
  1. Spectas nos, Philomuse, cum lavamur,
  2. Et quare mihi tam mutuniati
  3. Sint leves pueri, subinde quaeris.
  4. Dicam simpliciter tibi roganti:
  5. Pedicant, Philomuse, curiosos.
  1. Nescio tam multis quid scribas, Fauste, puellis:
  2. Hoc scio, quod scribit nulla puella tibi.
  1. Sescenti cenant a te, Iustine, vocati
  2. Lucis ad officium quae tibi prima fuit.
  3. Inter quos, memini, non ultimus esse solebam;
  4. Nec locus hic nobis invidiosus erat.
  5. Postera sed festae reddis sollemnia mensae:
  6. Sescentis hodie, cras mihi natus eris.
  1. Et delator es et calumniator,
  2. Et fraudator es et negotiator,
  3. Et fellator es et lanista. Miror
  4. Quare non habeas, Vacerra, nummos.
  1. Nil mihi das vivus; dicis post fata daturum.
  2. Si non es stultus, scis, Maro, quid cupiam.
  1. Parva rogas magnos; sed non dant haec quoque magni.
  2. Ut pudeat levius te, Matho, magna roga.
  1. Amphitheatrales inter nutrita magistros
  2. Venatrix, silvis aspera, blanda domi,
  3. Lydia dicebar, domino fidissima Dextro,
  4. Qui non Erigones mallet habere canem,
  5. Nec qui Dictaea Cephalum de gente secutus
  6. Luciferae pariter venit ad astra deae.
  7. Non me longa dies nec inutilis abstulit aetas,
  8. Qualia Dulichio fata fuere cani:
  9. Fulmineo spumantis apri sum dente perempta,
  10. Quantus erat, Calydon, aut, Erymanthe, tuus.
  11. Nec queror infernas quamvis cito rapta sub umbras:
  12. Non potui fato nobiliore mori.
  1. Vendere, Tucca, potes centenis milibus emptos?
  2. Plorantis dominos vendere, Tucca, potes?
  3. Nec te blanditiae, nec verba rudesve querellae,
  4. Nec te dente tuo saucia colla movent?
  5. A facinus! tunica patet inguen utrimque levata,
  6. Inspiciturque tua mentula facta manu.
  7. Si te delectat numerata pecunia, vende
  8. Argentum, mensas, murrina, rura, domum;
  9. Vende senes servos, ignoscent, vende paternos:
  10. Ne pueros vendas, omnia vende, miser.
  11. Luxuria est emere hos—quis enim dubitatve negatve?—,
  12. Sed multo maior vendere luxuria est.
  1. Hystericam vetulo se dixerat esse marito
  2. Et queritur futui Leda necesse sibi;
  3. Sed flens atque gemens tanti negat esse salutem
  4. Seque refert potius proposuisse mori.
  5. Vir rogat, ut vivat virides nec deserat annos,
  6. Et fieri, quod iam non facit ipse, sinit.
  7. Protinus accedunt medici medicaeque recedunt,
  8. Tollunturque pedes. O medicina gravis!
  1. Drauci Natta sui vocat pipinnam,
  2. Collatus cui+ Gallus est Priapus.
  1. Venturum iuras semper mihi, Lygde, roganti
  2. Constituisque horam constituisque locum.
  3. Cum frustra iacui longa prurigine tentus,
  4. Succurrit pro te saepe sinistra mihi.
  5. Quid precer, o fallax, meritis et moribus istis?
  6. Umbellam luscae, Lygde, feras dominae.
  1. Curandum penem commisit Baccara Raetus
  2. Rivali medico. Baccara Gallus erit.
  1. Theca tectus ahenea lavatur
  2. Tecum, Caelia, servus; ut quid, oro,
  3. Non sit cum citharoedus aut choraules?
  4. Non vis, ut puto, mentulam videre.
  5. Quare cum populo lavaris ergo?
  6. Omnes an tibi nos sumus spadones?
  7. Ergo, ne videaris invidere,
  8. Servo, Caelia, fibulam remitte.
  1. Solvere, Paete, decem tibi me sestertia cogis,
  2. Perdiderit quoniam Bucco ducenta tibi.
  3. Ne noceant, oro, mihi non mea crimina: tu qui
  4. Bis centena potes perdere, perde decem.
  1. In omnibus Vacerra quod conclavibus
  2. Consumit horas et die toto sedet,
  3. Cenaturit Vacerra, non cacaturit.
  1. Utere femineis conplexibus, utere, Victor,
  2. Ignotumque sibi mentula discat opus.
  3. Flammea texuntur sponsae, iam virgo paratur,
  4. Tondebit pueros iam nova nupta tuos.
  5. Pedicare semel cupido dabit illa marito,