Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Marri, quietae cultor et comes vitae,
  2. Quo cive prisca gloriatur Atina,
  3. Has tibi gemellas barbari decus luci
  4. Conmendo pinus ilicesque Faunorum
  5. Et semidocta vilici manu structas
  6. Tonantis aras horridique Silvani,
  7. Quas pinxit agni saepe sanguis aut haedi,
  8. Dominamque sancti virginem deam templi,
  9. Et quem sororis hospitem vides castae
  10. Martem mearum principem Kalendarum,
  11. Et delicatae laureum nemus Florae,
  12. In quod Priapo persequente confugit.
  13. Hoc omne agelli mite parvuli numen
  14. Seu tu cruore sive ture placabis:
  15. 'Ubicumque vester Martialis est,' dices,
  16. 'Hac, ecce, mecum dextera litat vobis
  17. Absens sacerdos; vos putate praesentem
  18. Et date duobus quidquid alter optabit.'
  1. Si prior Euganeas, Clemens, Helicaonis oras
  2. Pictaque pampineis videris arva iugis,