Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Non secat et tollit stillantem Fannius uvam,
  2. Tristia saxorum stigmata delet Eros;
  3. Enterocelarum fertur Podalirius Hermes:
  4. Qui sanet ruptos dic mihi, Galle, quis est?
  1. Argenti libram mittebas; facta selibra est,
  2. Sed piperis. Tanti non emo, Sexte, piper.
  1. Anxuris aequorei placidos, Frontine, recessus
  2. Et propius Baias litoreamque domum,
  3. Et quod inhumanae cancro fervente cicadae
  4. Non novere nemus, flumineosque lacus
  5. Dum colui, doctas tecum celebrare vacabat
  6. Pieridas: nunc nos maxima Roma terit.
  7. Hic mihi quando dies meus est? iactamur in alto
  8. Urbis, et in sterili vita labore perit,
  9. Dura suburbani dum iugera pascimus agri