Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Gallo turpius est nihil Priapo.
  1. Si, Lucane, tibi vel si tibi, Tulle, darentur
  2. Qualia Ledaei fata Lacones habent,
  3. Nobilis haec esset pietatis rixa duobus,
  4. Quod pro fratre mori vellet uterque prior,
  5. Diceret infernas et qui prior isset ad umbras:
  6. 'Vive tuo, frater, tempore, vive meo.'
  1. Ventris onus misero, nec te pudet, excipis auro,
  2. Basse, bibis vitro: carius ergo cacas.
  1. Quem recitas meus est, o Fidentine, libellus:
  2. Sed male cum recitas, incipit esse tuus.
  1. Si quis erit raros inter numerandus amicos,
  2. Quales prisca fides famaque novit anus,
  3. Si quis Cecropiae madidus Latiaeque Minervae
  4. Artibus et vera simplicitate bonus,
  5. Si quis erit recti custos, mirator honesti
  6. Et nihil arcano qui roget ore deos,
  7. Si quis erit magnae subnixus robore mentis:
  8. Dispeream, si non hic Decianus erit.
  1. Qui ducis vultus et non legis ista libenter,
  2. Omnibus invideas, livide, nemo tibi.
  1. Urbanus tibi, Caecili, videris.
  2. Non es, crede mihi. Quid ergo? verna,
  3. Hoc quod transtiberinus ambulator,
  4. Qui pallentia sulphurata fractis
  5. Permutat vitreis, quod otiosae
  6. Vendit qui madidum cicer coronae,
  7. Quod custos dominusque viperarum,
  8. Quod viles pueri salariorum,
  9. Quod fumantia qui tomacla raucus
  10. Circumfert tepidis cocus popinis,
  11. Quod non optimus urbicus poeta,
  12. Quod de Gadibus improbus magister,
  13. Quod bucca est vetuli dicax cinaedi.
  14. Quare desine iam tibi videri,
  15. Quod soli tibi, Caecili, videris,
  16. Qui Gabbam salibus tuis et ipsum
  17. Posses vincere Tettium Caballum.
  18. Non cuicumque datum est habere nasum:
  19. Ludit qui stolida procacitate,
  20. Non est Tettius ille, sed caballus.
  1. Coniugis audisset fatum cum Porcia Bruti
  2. Et subtracta sibi quaereret arma dolor,
  3. 'Nondum scitis' ait 'mortem non posse negari?
  4. Credideram, fatis hoc docuisse patrem.'
  5. Dixit et ardentis avido bibit ore favillas.
  6. I nunc et ferrum, turba molesta, nega.
  1. Bis tibi triceni fuimus, Mancine, vocati
  2. Et positum est nobis nil here praeter aprum,
  3. Non quae de tardis servantur vitibus uvae
  4. Dulcibus aut certant quae melimela favis,
  5. Non pira quae longa pendent religata genesta
  6. Aut imitata brevis Punica grana rosas,
  7. Rustica lactantes nec misit Sassina metas
  8. Nec de Picenis venit oliva cadis:
  9. Nudus aper, sed et hic minimus qualisque necari
  10. A non armato pumilione potest.
  11. Et nihil inde datum est; tantum spectavimus omnes:
  12. Ponere aprum nobis sic et harena solet.
  13. Ponatur tibi nullus aper post talia facta,
  14. Sed tu ponaris cui Charidemus apro.
  1. Lascivos leporum cursus lususque leonum
  2. Quod maior nobis charta minorque gerit
  3. Et bis idem facimus, nimium si, Stella, videtur
  4. Hoc tibi, bis leporem tu quoque pone mihi.
  1. Edita ne brevibus pereat mihi cura libellis,
  2. Dicatur potius Τὸν δ' ἀπαμειβόμενοσ.
  1. Cum dicis 'Propero, fac si facis,' Hedyle, languet
  2. Protinus et cessat debilitata Venus.
  3. Expectare iube: velocius ibo retentus.
  4. Hedyle, si properas, dic mihi, ne properem.
  1. Nuper erat medicus, nunc est vispillo Diaulus:
  2. Quod vispillo facit, fecerat et medicus.
  1. Rictibus his tauros non eripuere magistri,
  2. Per quos praeda fugax itque reditque lepus;
  3. Quodque magis mirum, velocior exit ab hoste
  4. Nec nihil a tanta nobilitate refert.
  5. Tutior in sola non est cum currit harena,
  6. Nec caveae tanta conditur ille fide.
  7. Si vitare canum morsus, lepus inprobe, quaeris,
  8. Ad quae confugias ora leonis habes.
  1. Vir Celtiberis non tacende gentibus
  2. Nostraeque laus Hispaniae,
  3. Videbis altam, Liciniane, Bilbilin,
  4. Equis et armis nobilem,
  5. Senemque Caium nivibus, et fractis sacrum
  6. Vadaveronem montibus,
  7. Et delicati dulce Boterdi nemus,
  8. Pomona quod felix amat.
  9. Tepidi natabis lene Congedi vadum
  10. Mollesque Nympharum lacus,
  11. Quibus remissum corpus adstringes brevi
  12. Salone, qui ferrum gelat.
  13. Praestabit illic ipsa figendas prope
  14. Voberca prandenti feras.
  15. Aestus serenos aureo franges Tago
  16. Obscurus umbris arborum;
  17. Avidam rigens Derceita placabit sitim