Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. sed cum pervigiles placet instaurare popinas,
  2. obvius adsiduo Syrophoenix unctus amomo
  3. currit, Idymaeae Syrophoenix incola portae,
  4. hospitis adfectu dominum regemque salutat,
  5. et cum venali Cyane succincta lagona.
  6. Defensor culpae dicet mihi ‘fecimus et nos
  7. haec iuvenes.’ esto, desisti nempe nec ultra
  8. fovisti errorem, breve sit quod turpiter audes;
  9. quaedam cum prima resecentur crimina barba,
  10. indulge veniam pueris: Lateranus ad illos
  11. thermarum calices inscriptaque lintea vadit
  12. maturus bello Armeniae Syriaeque tuendis
  13. amnibus et Rheno atque Histro; praestare Neronem
  14. securum valet haec aetas, mitte Ostia, Caesar,
  15. mitte, sed in magna legatum quaere popina;
  16. invenies aliquo cum percussore iacentem,
  17. permixtum nautis et furibus ac fugitivis,
  18. inter carnifices et fabros sandapilarum
  19. et resupinati cessantia tympana galli,
  20. aequa ibi libertas, communia pocula, lectus