Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. spes nulla ulterior; didicit iam dives avarus
  2. tantum admirari, tantum laudare disertos,
  3. ut pueri Iunonis avem. sed defluit aetas
  4. et pelagi patiens et cassidis atque ligonis.
  5. taedia tunc subeunt animos, tunc seque suamque
  6. Terpsichoren odit facunda et nuda senectus.
  7. Accipe nunc artes ne quid tibi conferat iste
  8. quem colis et Musarum et Apollinis aede relicta,
  9. ipse facit versus, atque uni cedit Homero
  10. propter mille annos, et si dulcedine famae
  11. succensus recites, maculosas[*](maculosas Heinr.: maculonsas Ribb. Housman: maculonus Ψ, maculonis PGBüch.) commodat aedes;
  12. haec longe ferrata domus servire iubetur,
  13. in qua sollicitas imitatur ianua portas,
  14. scit dare libertos extrema in parte sedentis
  15. ordinis et magnas comitum disponere voces:
  16. nemo dabit regum quanti subsellia constant
  17. et quae conducto pendent anabathra tigillo,
  18. quaeque reportandis posita est orchestra cathedris.
  19. nos tamen hoc agimus tenuique in pulvere sulcos
  20. ducimus et litus sterili versamus aratro,