Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. suadendum esse putes cui nubere Caesaris uxor
  2. destinat? optimus hic et formosissimus idem
  3. gentis patriciae rapitur miser extinguendus
  4. Messalinae oculis; dudum sedet illa parato
  5. flammeolo Tyriusque palam genialis in hortis
  6. sternitur et ritu decies centena dabuntur
  7. antiquo, veniet cum signatoribus auspex.
  8. haec tu secreta et paucis commissa putabas?
  9. non nisi legitime vult nubere, quid placeat dic:
  10. ni parere velis, pereundum erit ante lucernas;
  11. si scelus admittas, dabitur mora parvula, dum res
  12. nota urbi et populo contingat principis aurem,
  13. dedecus ille domus sciet ultimus; interea tu
  14. obsequere imperio, si tanti vita dierum
  15. paucorum, quidquid levius meliusve putaris,
  16. praebenda est gladio pulchra haec et candida cervix.
  17. Nil ergo optabunt homines? si consilium vis,
  18. permittes ipsis expendere numinibus quid
  19. conveniat nobis rebusque sit utile nostris,
  20. nam pro iucundis aptissima quaeque dabunt di: