Noctes Atticae

Gellius, Aulus

Gellius, Aulus. The Attic Nights of Aulus Gellius. Rolfe, John C., editor. Cambridge, Mass.; London: Harvard University Press; William Heinemann, 1927 (printing).

Eadem ratione Laberius quoque in Sororibus:

  1. Ecastor (inquit) mustum somniculosum,

et Cinna in poematis:

  1. Somniculosam ut Poénus aspidém Psyllus.

Metus quoque et iniuria atque alia quaedam id genus sic utroqueversum dici possunt; nam metus hostium recte dicitur et cum timent

hostes et cum timentur.

Itaque Sallustius in Historia prima metum Pompei dixit, non quo Pompeius metueret, quod est usitatius, sed quo metueretur. Verba haec Sallusti sunt: Id bellum excitabat metus Pompei victoris, Hiempsalem in regnum restituentis.

Item alio in loco: Postquam remoto metu Punico simultates exercere vacuum fuit.

Iniurias itidem dicimus tam illorum qui patiuntur, quam qui faciunt, quarum dictionum exempla sunt facilia. inventu.

Illud etiam dictum a Vergilio eandem habet formam communicatae ultro et citro significationis:

  1. et vulnere (inquit) tardis Ulixi,
cum diceret vulnus, non quod accepisset Ulixes, sed quod dedisset.

Nescius quoque dicitur tam is qui nescitur, quam qui nescit.

Sed super eo qui nescit, frequens huius vocabuli usus est, infrequens autem est de eo quod nescitur.

Ignarus aeque utroqueversum dicitur, non tantum qui ignorat, set et qui ignoratur.

Plautus in Rudente:

  1. Quae ín locis nésciis néscia spé sumus.
Sallustius:

More humanae cupidinis ignara visendi. Vergilius:

  1. ignarum Laurens habet ora Mimanta.

Verba ex historia Claudi Quadrigari, quibus Manli Torquati, nobilis adulescentis, et hostis Galli provocantis pugnam depinxit.

TITUS MANLIUS summo loco natus adprimeque nobilis fuit.

Ei Manlio cognomentum factum est Torquatus.

Causam cognomenti fuisse accepimus torquis ex auro , quam ex hoste quem occiderat detractam induit.

Sed quis hostis et quid genus, quam formidandae vastitatis et quantum insolens provocator et cuimodi fuerit pugna decertatum, Q. Claudius primo Annalium purissime atque inlustrissime simplicique et incompta orationis antiquae suavitate descripsit.